Akarere ka Nyamasheke kimwe n'utundi turere tw'u Rwanda, kari mu rugamba rwo gusigasira Ubumwe n'Ubudaheranwa bw'Abanyarwanda!  By'umwihariko muri uku kwezi k’Ukwakira kwariwe kwimakaza Ubumwe n’Ubudaheranwa bw’Abanyarwanda. Ni muri urwo rwego ku wa 24 Ukwakira 2025 hateranye inama y'Ihuriro ry'Ubumwe n'Ubudaheranwa, hareberwa hamwe uko akarere gahagaze mu gushyira mu bikorwa imyanzuro y'inama y'ihuriro ry'ubumwe n'ubudaheranwa yabanje, hagamijwe kandi kongera gufata ingamba zo kwimakaza Ubumwe n'ubudaheranwa bw'Abanyarwanda. 

Iyi nama y'Ihuriro ry'Ubumwe n'Ubudaheranwa yitabiriwe n'Umunyamabanga wa Leta muri Minisiteri ya Siporo akaba n'imboni ya Guverinoma mu karere ka Nyamasheke Bwana Ngarambe Rwego, abagize ihuriro ry'Ubumwe n'Ubudaheranwa mu karere n'abandi akarere kabona ko ari ngombwa, abagize komite y'umutekano y'akarere itaguye, abagize Njyanama y'akarere, Abanyamabanga Nshingwabikorwa, abafatanyabikorwa, abanyamadini n’amatorero  n'abandi bafite aho bahuriye mu kwimakaza Ubumwe n'ubudaheranwa bafatanyije n'akarere.

Mu ijambo ry'ikaze umuyobozi w'Akarere ka Nyamasheke Bwana Mupenzi Narcisse yashimiye abitabiriye ihuriro cyane cyane Umunyamabanga wa Leta muri Minisiteri ya Siporo Bwana Ngarambe Rwego kuba yitabiriye Inama y'Ihuriro ry'Ubumwe n'Ubudaheranwa mu karere kandi amwifuriza ikaze, akomeza yerekana ko Ubumwe n'Ubudaheranwa mu Rwanda rwo hambere ari bwo bwatumaga u Rwanda ruba inganzamarumbo, bugatuma igihugu kidatsindwa, kandi n'igihe cyahuye n'ibizazane kikabitsindisha ubudaheranwa  nk'indangagaciro yarangaga abanyarwanda bose.

Umuyobozi w'akarere akaba na Perezida w'ihuriro ry'ubumwe n'ubudaheranwa yakomeje agaragaza ishusho y'akarere mu rugendo rw'ubumwe n'ubudaheranwa, agaragaza ko hari byinshi byakozwe birimo ibiganiro n'ibyiciro binyuranye birimo abarangije ibihano ku byaha bya Jenoside yakorewe Abatutsi, ibiganiro ku bumwe n'ubudaheranwa akarere ka Nyamasheke kagiramo uruhare mu igororero rya Nyamasheke bihabwa abagororwa bahamwe n'ibyaha bya Jenoside yakorewe Abatutsi 1994 bakaba basigaje igihe gito ngo basoze ibihano, ibiganiro ku bumwe n'ubudaheranwa mu mashuri, urugendo rw'isanamitima akarere gafatanyamo na Kiliziya Gatilika, n'ibindi.  

Umuyobozi w’akarere kandi yakomeje yerekana ko mu ka Nyamasheke igipimo cy’ubumwe n’ubwiyunge kigeze kuri 96.4, bikaba bisaba guhora hazirikanwa isano muzi y’abanyarwanda gusigasira amahitamo y’Abanyarwanda ari yo: kuba umwe, gutekereza byagutse no kubazwa inshingo.

Mu ijambo ry'umushyitsi mukuru Bwana Ngarambe Rwego yagaragaje ko Abanyarwanda bataye igihe kinini bapfa ubusa (nta kintu kizima bakora), asaba ko Abanyarwanda bakunga ubumwe mu magambo akurikira: 

"Dufite imyaka irenga 100 twabayeho dupfa ubusa, twabayeho tudatekereza nk' Abanyarwanda ahubwo dutekereza buri wese mu nyungu ze.
Nk'Abanyarwanda, mu kugarura icyo gihe twataye, uyu munsi biradusaba gutekereza bigari. Nta kintu na kimwe cyabaye mu mateka yacu tudafitemo uruhare nk'Abanyarwanda. Duhigire kutamenerwamo, duhigire kuba abarimu ba bagenzi bacu, duhigire ko aho turi hatavanwamo umwe muri twe ngo agaruke gusenya ibi twagezeho….  Mureke tujishe ibisabo byacu kwa mugenzi wacu (umuturanyi), bizatuma tutahatera ibuye, twubake ubumwe n'urukundo, imigenderanire tutishishanya.. dutahirize umugozi umwe kugira ngo tugeze u Rwanda ku iterambere twifuza.  Nk'ababonye byinshi dufite byinshi twakwigisha isi, duciye bugufi ariko, kuko turacyafite inzira ndende yo kugenda… Dukomeze tugire intumbero ngari twarazwe na Nyakubahwa Perezida wa Repubulika Paul Kagame, turi aha kubera ibyo yatekereje, tuzakomeza kubikuba inshuro 1000 nitumwiga ingendo n'imvugo…. u Rwanda dushaka nk'urubyiruko ni twebwe tugomba kurugira ukonguko dushaka."

Muri ibi biganiro n'ubwo byagaragaye ko hari intambwe ishimishije ikomeje guterwa mu rugendo rw'ubumwe n'ubudaheranwa,  byagaragaye ko hakiri n’ibindi byinshi bibangamiye uru rugendo, nk'abarokotse Jenoside yakorewe Abatutsi 1994 bakibwirwa amagambo abakomeretsa, abatarabasha kubona imibiri y'ababo bazize Jenoside yakorewe Abatutsi 1994 kugira ngo ishyingurwe mu cyubahiro, ibikorwa bigaragaramo ingengabitekerezo ya jenoside cyane cyane ibikwirakwizwa ku mbuga nkoranyambaga n'ibindi. Abitabiriye inama basabwe ubufatanye kugira ngo ibi bibazo byose bishakirwe ibisubizo cyane cyane hasabwa ko abantu bakwihatira kuvugisha ukuri, abakoze Jenoside yakorewe Abatutsi 1994 bagatera intambwe bagasaba imbabazi kandi bagatanga n'amakuru y'ahari imibiri itarashyingurwa mu cyubahiro kugira ngo ishyingurwe, no gusubiza abakwirakwiza ingengabitekerezo ya jenoside n'amacakubiri ku mbuga nkoranyambaga hatangwa amakuru y'ukuri ku byabaye mu Rwanda kandi hasigasirwa indangagaciro z'ubumwe n'ubudaheranwa bw'Abanyarwanda. 

Umunyamabanga wa Leta muri Minisiteri ya Siporo Bwana Ngarambe Rwego ageza ijambo ku bitabiriye ihuriro

Bamwe mu bagize Njyanama y'Akarere n'umuyobozi w'inkeragutabara n'uwa polisi y'u Rwanda mu karere ka Nyamasheke bari bitabiriye ihuriro ry'ubumwe n'ubudaheranwa 

Ifoto y'abitabiriye ihuriro ry'ubumwe n'ubudaheranwa