Mu rwego rwa Garuka urebe , gahunda ikorwa n’abaturage b’abanyarwanda

batuye mu mahanga (Diaspora Nyarwanda) , Umunyarwandakazi na  Kayiganwa wa

Rwiyamirira ukomoka mu Karere ka Nyamasheke afatanyanyije n'Umugabo we Paul

Wauters n'inshuti ze z'abanyaburayi bateye inkunga Ikigo cy’Amashuri abanza cya Mwezi yo kubaka ibyumba by’amashuri bitandatu  bikaba byamurikiwe

akarere kuru uyu wa 04 Mata 2016 mu mumuhango wari uhagarariwe na Madame Mukamana Claudette , Umuyobozi w’Akarere wungirije ushinzwe imibereho myiza

y’abaturage

Mu ijambo rye Umuyobozi w'Akarere Wungirije Ushinzwe Imibereho Myiza y'Abaturage Madame MUKAMANA Claudette wari umushyitsi mukuru muri uyu muhango yashimye cyane inkunga KAYIGANWA yageneye Ikigo yizeho by'umwihariko

n'abaturage b'Akarere ka Nyamasheke muri rusange. Akaba yasabye abanyeshuri

n'abarezi bo muri EP Mwezi kuzafata neza ayo mashuri bubakiwe kugirango azabashe kuramba. Yaboneyeho no gusaba buri wese mu bari bateraniye aho kugira umuco mwiza w'ubwitange n'ubufatanye muri gahunda zizamura imibereho myiza y'umuturage.

Uyu KAYIGANWA ni umunyarwandakazi wavukiye mu Rwanda ndetse akaba yarize muri iki kigo cya EP Mwezi  kugera 1954,aho yahize imyaka ibiri gusa uwa kane n'uwa gatanu w'amashuri abanza, akomereza amashuri yisumbuye i Kigali, yavuye mu Rwanda ahunze muri 1960 n'ababyeyi be agera mu Bubiligi muri 1964,ari naho yaje gushaka akaba ari naho atuye kugeza ubu.

Igitekerezo cyo kubaka amashuri cyamujemo mu gihe yasanze ishuri yizeho

rya EP Mwezi ririmo risenyuka, abana bigira ahantu hatameze neza, mu gihe

abanyarwanda barimo biyemeza umusanzu wabo mu kigega Agaciro Development Fund, nawe yarahagurutse yiyemeza ko azubaka ishuri ndetse abyemera nta bushobozi afite ku buryo n'uwo bashakanye byamutangaje kubyumva kuko yabonaga ari igikorwa kiza kivuye ku mutima. yageze mu Bubiligi ateranya inshuti ze zo bahuje umutima wo kuzamura abantu barusha ubushobozi ababwira igitekerezo cye noneho bumva icyo ashaka gukora baramushyigikira.

Ubu amaze kuhubaka ibyumba bitandatu ariko afite igitekerezo cyo kubaka ikigo cyose kuko ibyumba bindi bigihari bitameze neza. Akaba yifuza kandi ko n'abana bo mu Rwanda batanga umusanzu wabo ku buryo iryo shuri ryaba ikimenyetso cy'umutima w'impuhwe n'ubugwaneza w'abantu batandukanye bahuje.

Ku bwe KAYIGANWA  asanga iryo shuri ryaramubereye ikigisho cy'uko abantu bose baba abazungu cyangwa abirabura , abakire cyangwa abakene ari bamwe ariko bagatandukanira ku mutima kuko hari abakene n'abakire bamufashije kubaka ibyo byumba.

Mu bindi bikorwa yakoze harimo abanyeshuri 50 yafashije biga muri GS Nyarusange gufatira ifunguro rya saa sita ku ishuri. Uyu  KAYIGANWA anejejwe n'uko Imana yamufashije akabasha gutanga umusanzu we mu kubaka Igihugu cyamubyaye.

Kayiganwa si amashuri gusa yubatse ahubwo yagiye arangwa n’bindi bikorwa bigaragaza urukundo akunda igihugu cyamubyaye birimo nko gukoresha umuhanda uva ku kigo nderabuzima cya Mwezi ugera ku kibuga cy'umupira cyo kwa Rwiyamirira, guha imyenda yo kwambara abakinnyi b'umupira w'amaguru ba Karengera byanatumye ahabwa ishimwe n'Akarere ka Nyamasheke

TUYIZERE Jacques

Public  Relations, Media and Communication Officer