Umudugudu wa Kirehe ni umwe mu midugudu yihariye mu karere ka Nyamasheke kuko uyu midugudu wose ari ikirwa. Umudugudu wa Kirehe uherereye mu murenge wa Macuba, akagari ka Rugari ukaba utuwe n'ingo 168.

Ubwo umuyobozi w'akarere ka Nyamasheke Bwana Mupenzi Narcisse yasuraga abaturage b'uyu mudugudu ku gicamunsi cy'uwa 03 Mata 2025, abaturage bamwakiranye ibyishimo mu mbyino zishimishije. 

Umuyobozi w'akare yababwiye ko yasuye uyu mudugudu kugira ngo baganire muri rusange, barebera hamwe uko bashyira gahunda za leta mu bikorwa no kujya inama muri rusange. 

Mu biganiro bagiranye, hagarutswe ku mutekano aho abayobozi basanze abinjira kuri iki kirwa bandikwa neza mu gitabo cy'ushinzwe umutekano mu mudugudu. Ibi byashimishije abayobozi basaba ko ubuyobozi bw'umudugudu bwakomereza aho nta gutezuka. 

Umuyobozi w'akarere yabwiye abaturage ba Kirehe ko ubuyobozi bubazirikana kandi hakaba hari kureberwa hamwe uburyo bazagezwaho amazi n'amashanyarazi n'ubwo uyu mudugudu wihariye ugereranyije n'indi midugudu.

Yashimye ko uyu mudugudu utarangwamo amakimbirane yo mu ngo asaba abagize umutyango kwimakaza indangagaciro z'umuryango uzira amakimbirane.

Abatuye mu mudugudu wa Kirehe basabwe kuzitabira ibikorwa n'ibiganiro byateguwe mu gihe cyo kwibuka cyegereje kandi basabwa kwirinda ingengabitekerezo no gupfobya jenoside yakorewe abatutsi.