Kuri uyu wa 6 Ukwakira 2025, mu karere ka Nyamasheke habereye ibiganiro byateguwe n’Ikigo cy’u Rwanda gishinzwe ibimenyetso bya gihanga bikoreshwa mu butabera (Rwanda Forensic Institute – RFI), bigamije gusobanurira abayobozi bo mu nzego zitandukanye inshingano bafite mu gufasha abaturage kumenya no gukoresha serivisi z’iki kigo.

Mu ijambo rye, Dr Karangwa Charles, Umuyobozi Mukuru wa RFI, yagaragaje intambwe u Rwanda rumaze gutera mu gukoresha ikoranabuhanga mu butabera, ashimangira ko igihugu cyatangiye gahunda yo kwegereza abaturage serivisi zishingiye kubimenyetso bya gihanga byifashishwa mu butabera kugira ngo buri muturage abashe kubona ubutabera bwihuse kandi bunoze. Yavuze ko muri iyi gahunda, serivisi zizatangira gutangwa mu bice bitandukanye by'igihugu, aho mu ntara y'Iburengerazuba izi serivisi zizatangirwa mu turere twa Rusizi na Rubavu, zikazafasha n’abaturage bo mu karere ka Nyamasheke n’utundi duce twegereye aho zitangirwa.

Yibukije ko ibi bikorwa biri muri gahunda ya kabiri y’igihugu (NST2) ahagaragaramo iterambere ry'ikoranabuhanga mu nzego zose, harimo n'ibi bimenyetso bya gihanga byifashishwa mu butabera, kandi ashimangira ko ubufatanye bw’abayobozi bo mu nzego z’ibanze ari ingenzi kugira ngo abaturage basobanukirwe serivisi, bazifashishe, kandi bazigiremo uruhare.

Umuyobozi w'akarere ka Nyamasheke Bwana Mupenzi Narcisse yashimiye ikigo cy'u Rwanda gishinzwe ibimenyetso bya gihanga byifashishwa mu butabera, avuga ko ubukangurambaga nk'ubu bwari bukenewe mu karere ka Nyamasheke kuko wasangaga serivisi zitangwa n'iki kigo zitazwi na benshi. Yijeje ubuyobozi bwa RFI ko akarere n'abafatanyabikorwa bagiye gufasha abaturage gusobanukirwa neza serivisi zitangwa na RFI bityo igihe bazikeneye bakazajya bazisaba nta guhuzagurika.

Abitabiriye ikiganiro bahawe umwanya babaza ibibazo kuri serivisi za RFI, bahabwa ibisobanuro cyane cyane ibijyanye n'ibisabwa kugira ngo umuturage abone serivisi, igihe bisaba kugira ngo serivisi iboneke ndetse n'ikiguzi cyayo. 

Hatanzwe ibitekerezo biganisha kugukomeza kumenyekanisha serivisi za RFI hifuzwa ko hategurwa inyandiko zifasha abaturage kumenya izi serivisi, n'ibiganiro ku maradiyo cyane cyane ayumvikana mu kare re ka Nyamasheke. Biyemeje kandi gutwara ubutumwa bakabushyikiriza abaturage bityo buri wese ukeneye serivisi za RFI akajya azibona azisobanukiwe kandi ku buryo bwihuse. 

Ubu bukangurambaga bwa RFI buri gutangwa binyuze muri gahunda y'iki kigo y'ubukangurambaga yiswe “Sobanukirwa RFI 2025.”