Kuri uyu wa 4 Nzeri 2025, Umunyamabanga Nshingwabikorwa w’Akarere ka Nyamasheke, Bwana Muneza Placide, yayoboye inama yahuje ubuyobozi bw’akarere n’intumwa za MINEMA mu rwego rwo kugenzura no gusuzuma uburyo ibikorwa-remezo by’ingenzi bihagaze mu guhangana n’ibiza bishobora guterwa n’umutingito, hagamijwe kurushaho kubungabunga umutekano w’abaturage no kongera ubushobozi bwo guhangana n’ingaruka z’ibiza.

Iyi nama yibanze ku gusesengura politiki, ubushobozi ndetse n’uburyo inyubako nk’amashuri, ibitaro, amasoko, amahoteri, inyubako z’ubuyobozi, n'ibindi bikorwa remezo byubakwa hashingiwe ku mabwiriza agenga imyubakire mu turere tugaragara ku rutonde rw'udufite ibyago byinshi byo kwibasirwa n'umutingito mu Ntara y’Iburengerazuba n'akarere ka Nyamasheke karimo, nk’uko byagaragajwe mu itangazo rya MINEMA ryo ku wa 26 Kanama 2025. 

Umunyamabanga nshingwabikorwa w'akarere yagaragaje ko hari amategeko ajyanye n'imitangire y'ibyangombwa ku nyubako n'ibikorwa remezo abakozi b'akarere bakwiye guhabwaho amahugurwa kugira ngo babashe kujya bakurikiza ibisabwa byose mu gutanga ibyo byangombwa byo kubaka hanitabwa ku ihame ryo kubaka inyubako n'ibikorwaremezi bishobora kwihanganira ibiza birimo n'umutingito. 

Abahagarariye MINEMA muri iyi nama bemeye ko bazatanga amahugurwa ku bakozi b'akarere bashinzwe ibijyanye no gutanga ndetse no gukurikirana inyubako mu karere. 

Nyuma y’inama, itsinda ryasuye bimwe mu bikorwa-remezo byibasiwe n’umutingito wo mu mwaka wa 2008, harebwa ishusho yabyo n’ingamba zashyirwaho mu rwego rwo gukumira ibiza byakongera kwibasira abaturage n’imiturire yabo.