Kuri uyu wa 1 Nzeri 2025, mu Karere ka Nyamasheke no mu tundi turere dutandukanye habaye amatora ya Komite y’Ihuriro ry’Abana ku rwego rw’Akarere. Amatora yabereye mu cyumba cy’Ikigo cy’Urubyiruko (Nyamasheke Youth Center) akaba yafunguwe ku mugaragaro n’Umunyamabanga Nshingwabikorwa w’Akarere, Bwana Muneza Placide.

Mu butumwa bwe, yabwiye abana ko bafite amahirwe akomeye yo guhagararira bagenzi babo, abasaba kubahiriza inshingano zabo no gutangira kwitoza imiyoborere bakiri bato.

Aya matora kandi yakurikiranwaga n’Umuhuzabikorwa wa Komisiyo y’Igihugu y’Amatora (NEC) ku rwego rw’Akarere, Madamu Uwamariya Consolée, n'abandi barimo polisi y'igihugu n'abakozi b'akarere bafashije kugira ngo amatora agende neza. 

Amatora yitabiriwe ku kigero cya 100%, kuko abana bose 90 baturutse mu mirenge 15 y’Akarere ka Nyamasheke bitabiriye inteko itora. Nyuma y’itora, hatowe Komite nshya igizwe n’abana 6 (abakobwa 4 n’abahungu 2) bakurikira:

1. Perezida: Amini Mary Gladys
2. Visi Perezida: Mukunzi Peace Alliance
3. Umunyamabanga: Shema Mahirwe Modeste
4. Umujyanama 1: Icyizihiza Mignone Hope
5. Umujyanama 2: Igiraneza Manzi Isaac
6. Uhagarariye abana bafite ubumuga: Mukeshuwera Velena

Amatora ku rwego rw’Intara y’Iburengerazuba azakomereza ku wa 2 Nzeri 2025 mu Karere ka Karongi guhera saa tatu za mu gitondo, aho abana batoranyijwe bazaba bahagarariye Nyamasheke biteguye neza hamwe n’imiryango yabo.