Ku mugoroba wo ku wa 31 Kanama 2025, ku kibuga cy’umupira cya Kirambo hasojwe ku mugaragaro imurikabikorwa n’imurikagurisha (Open Day & Mini Expo) cyari kimaze icyumweru kibera muri Nyamasheke kuva ku wa 25 kugeza ku wa 31 Kanama 2025. Mu butumwa bwatanzwe n’ubuyobozi bw’Akarere, bwemeje ko iki gikorwa kizajya kiba buri mwaka mu rwego rwo guteza imbere ishoramari n’ubufatanye mu iterambere ry’akarere.

Mu ijambo rye, Umuyobozi w’Urugaga rw’Abikorera mu Karere ka Nyamasheke, Madamu Isabel Uzamukunda, yashimiye Ihuriro ry’Abafatanyabikorwa b'akarere (JADF Jyambere Nyamasheke) n’ubuyobozi bw’Akarere ku mitegurire myiza y’iki gikorwa ndetse n’ubufasha akarere katanze. Yashimangiye ko iki gikorwa cyagize akamaro kadasanzwe kandi asaba ko cyajya kiba buri mwaka kugira ngo kigire uruhare rukomeye mu guteza imbere ishoramari mu Karere.

Umuyobozi w’Akarere Wungirije ushinzwe Iterambere ry’Ubukungu asoza iki gikorwa, yashimiye inzego zose n’abafatanyabikorwa batandukanye bagize uruhare mu gutegura no kwitabira igikorwa. Yavuze ko ku rwego rw’imitegurire n’ubwitabire bigaragaza ko igikorwa cy'imurikabikorwa n’imurikagurisha cyagenze neza; agira ati: “Uyu mwaka byari uburyo bwo kwipima ngo turebe ibyo dushoboye mu Karere, kandi twarize. Ibyaba bitaragenze neza bizadufasha gutegura neza igikorwa cy’umwaka utaha, kandi ubuyobozi bw’Akarere buzakora ibishoboka byose kugira ngo iki gikorwa kizajye kiba buri mwaka.”

Yasoje asaba Urugaga rw’Abikorera mu Karere ka Nyamasheke gukura amasomo ku bashoramari batandukanye bitabiriye iri murikagurisha, kugira ngo bongere kandi bagure ishoramari rigaragara ko rikenewe muri aka Karere.