Kuri uyu wa 22 Nzeri 2025, Umuyobozi w’Akarere wungirije ushinzwe Iterambere ry’Ubukungu, Bwana Muhayeyezu Joseph Désidré, yakiriye itsinda riyobowe na Madamu Nyinawagaga Claudine, Umuyobozi Mukuru wa LODA, ari kumwe n’abakozi bayo ndetse n’abafatanyabikorwa ba LODA (KfW).
Iri tsinda ryakiriwe n’umuyobozi wungirije w’akarere ryari mu rugendo rugamije gusura no gukurikirana ibikorwa by’imishinga ishingiye ku buhinzi, uburezi n’ubuzima; aho iyi mishinga yatekerejwe mu rwego rwo gukemura ibibazo byagaragaraga mu buhinzi bw’insina mu murenge wa Bushekeri na Karengera, ubucucike mu burezi na serivisi inoze ku bagana ikigo nderabuzima cya Mwezi.

Nyuma yo kwakirwa ku karere, itsinda ryasuye ibikorwa by’ingenzi byatewe inkunga na Banki itsura amajyambere y’Abadage (KfW):

• Uburezi: Hubatswe ibyumba 29 by’amashuri mu mirenge 6. Muri byo hakaba hasuwe ibyumba 5 harimo 3 kuri GS Maseka (Kanjongo) na 2 kuri Mwezi TSS (Karengera). Ibi byumba byagize uruhare rukomeye mu kugabanya ubucucike, biha abanyeshuri n’abarimu  kwigira mu buryo bworoshye kandi butanga umusaruro.
• Ubuhinzi: Mu murenge wa Bushekeri, hasuwe ubuhumbikiro bwa kijyambere bwo mu nzu bw’insina (banana greenhouse). Abaturage batangaje ko indwara ya Kirabiranya yari yarabaciye intege, ariko ubu bafite icyizere ko imbuto nshya zizatuma bongera kubona umusaruro n’amafaranga yo kwiteza imbere.
• Ubuzima: Ku kigo nderabuzima cya Mwezi, hatangiye ibikorwa byo kugisana no kukivugurura. Nk’uko byatangajwe n’Umuyobozi w’ikigo nderabuzima, Bwana Karangwa Jean Damascène, ibi bizafasha kwakira neza abarwayi no kongera serivisi z’ubuvuzi.

Abaturage bagaragaje ko bishimira imishinga y’ubuhinzi, uburezi n’ubuzima kuko hari izabafasha kwiteza imbere mu buhinzi, abana babo bakiga bisanzuye kandi na serivisi zo kwa muganga bakazazibona baherwa ahantu heza kandi hisanzuye.