Kubyara abo umuryango udashoboye kurera biracyari intandaro y’ubukene, imirire mibi n’amakimbirane mu miryango imwe n'imwe mu karere ka Nyamasheke. Abana benshi baracyavuka mu gihe imiryango yabo idafite ubushobozi bwo kubateganyiriza ejo hazaza. Iyo imiryango ibyaye abana benshi idafite ubushobozi bwo kubitaho, ubuzima bwabo buba buri mu kaga; abana ntibiga neza, imirire irahungabana, ndetse n’ubukene bukiyongera. Kwirengagiza kuboneza urubyaro bisiga ingaruka ku muryango wose no ku iterambere ry’Akarere.

Ni muri urwo rwego, kuva ku wa 15 kugeza ku wa 19 Nzeri 2025, Akarere ka Nyamasheke, ku bufatanye na RBC n'abafatanyabikorwa barimo HDI, UNFPA na RMS, hateguwe ubukangurambaga bwo kuboneza urubyaro.
Abajyanama b’Ubuzima n’abakozi b’amavuriro (amavuriro yo ku rwego rw'ibanze, ibigo nderabuzima n'ibitaro) bari gusura abaturage, babaha inyigisho n’ubufasha hanyuma abamaze kwigishwa bemeye gukoresha uburyo bwo kuboneza urubyaro bakabuhabwa.

Muri ubu bukangurambaga, hamaze kuboneka abantu 17 bazahabwa uburyo bwa burundu bwo kuboneza urubyaro, bakazafashirizwa ku bitaro, banahabwa uburyo bwo kuhagera n'amafunguro mu gihe bazaba bari ku bitaro. 
Ubukangurambaga bwamenyeshejwe abaturage binyuze mu matangazo yo mu nsengero, mu isibo n’ahandi hahurira abantu benshi.

Abaturage benshi batangiye kumva akamaro ko kuboneza urubyaro mu rwego rwo kugira umuryango utekanye, kurinda ubuzima bw’abana n’ababyeyi, no guhanga ejo hazaza heza h'umuryango. Iyo umuryango utaboneje urubyaro, uguma mu mwijima w’ubukene, uburwayi, amakimbirane mu muryango no kutagira ejo hazaza h'abana.

Insanganyamatsiko y’Ubukangurambaga igira iti:
"Kuboneza urubyaro, ejo hazaza heza."

Nyamasheke ntikwiye kugarizwa n'urusobe rw'ibibazo biterwa no kubyara abo umuryango udashobora kurera. Uburyo burahari kandi bwizewe—ni twe tugomba gufata iya mbere.