Mu izina rya Nyakubahwa Perezida wa Repubulika, Minisitiri mu Biro bye Uwizeye Judith yakiriye irage Intwaza Nyirangerageza Marianne yageneye Perezida wa Repubulika.

Nk’ uko byasobanuwe na Perezidante wa AVEGA ku rwego rw’ Igihugu Mukabayire Valérie ari na bo bari babitse inyandiko zikubiyemo irage  , Intwaza  Nyirangerageza yafashe icyemezo cyo kuraga Perezida wa Rupubulika kuko nyuma yo kubura abe bose (Abana icumi n’ umugabo) muri jenoside yakorewe Abatutsi , Perezida wa Repubulika ari we wahagaze mu mwanya wabo, anamuha agaciro yariyarambuwe n’ umuryango yasigaranye.

Yasize avuze ati “ Paul Kagame ni we wanyubakiye maze kuba incike, abonye intege zimbanye nke angenera ingoboka, ndetse ngeze mu za bukuru anyegereza abandi mu Mudugudu w’ Impinganzima”

Imitungo yose Nyirangerageza Marianne yaraze Perezida wa Repubulika Kagame Paul, igizwe n’ imirima itatu n’ inzu yabagamo mbere y’ uko atuzwa mu Mudugudu w’ Impinganzima mu Karere ka Rusizi , biherereye mu Murenge wa Bushekeri, akagari ka Nyarusange Umudugudu wa Mubuga.

Nk’ uko byasobanuwe na Minisitiri mu Biro bya Perezida wa Repubulika  Uwizeye Judith mu izina rya Perezida wa Repubulika, yakiriye iri rage ndetse aranaryishimira avuga ko yifuza ko hazubakwa igikorwaremeza kigirira akamaro abahatuye bose nk’ ikimenyetso gishimira umutima usima wa Nyirangerageza.

Umubyeyi Nyirangerageza Marianne yashaje mu kwezi kwa Gicurasi 2020 afite imyaka 73 y’ amavuko Kb yari amaze igihe atujwe mu Mudugudu w’ Impinganzima wagenewe Intwaza mu Karere ka Rusizi.