Kuri uyu wa gatandatu tariki ya 27 Nyakanga 2019, ihuriro tuzirikane gakondo ry’abaturuka mu Murenge wa Rangiro mu Kagali ka Banda bishyuriye ubwisungane mu kwivuza abantu 100 batishoboye baturutse mu miryango 17.

Ni nyuma y’igikorwa cy’Umuganda rusange usoza ukwezi kwa nyakanga wabareye muri aka Kagali ka Banda ku rwego rw’Akarere aho abaturage bifatanyije n’Umuyobozi w’Akarere Wungirije Ushinzwe Iterambere ry’ Imibereho Myiza y’Abaturage, Abayobozi b’ imirenge, Ingabo, ndetse n’abayozi b’amatorero atandukanye, hakorwa ibice by’umuhanda uva muri santere ya Banda werekeza ku Winka.

Nyuma y’Umuganda, abaturage bateraniye muri iyi santere baganira n’Abayobozi kuri gahunda za Leta zitandukanye. Umuyobozi w’Umurenge yakiriye umuyobozi w’Ihuriro Tuzirikane Gakondo, wavuze ko bakunda kandi bafite ku mutima gakondo yabo n’ubwo bakorera ahandi, yaboneyeho umwanya wo gutanga impano iri Huriro ryageneye bamwe mu baturage batishoboye bo mu tugali dutandukanye two mu mirenge ya Rangiro na Cyato (icyahoze ari Banda ya kera).

Impano ingana n’amafaranga y’U Rwanda ibihumbi maganatatu (300,000) niyo iri Huriro ryageneye aba baturage 100 batishoboye baturuka mu miryango 17, azakoreshwa mu kubishyurira ubwisungane mu kwivuza.

Umuyobozi w’iri Huriro Assiel akomeza avugako bazakomeza gukora n’ibindi bikorwa, mu rwego rwo gutanga umusanzu wabo mu iterambere ry’agace baturukamo ndetse n’ Igihugu muri rusange.

Uretse iri huriro ryishyuriye abantu 100 ubwisungane mu kwivuza, Itorero Iriba ry’amahoro y’’Imana naryo rikaba ryarishyuriye abantu 5 ubwisungane mu kwivuza.

Thomas, Umwe mu bishyuriwe ubwisungane mu kwivuza, yashimye Ubuyobozi bwateguye iki gikorwa ndetse n’ iri Huriro ku gikorwa cy’indashyikirwa ryabakoreye.

Umuyobozi w’Akarere Wungirije Ushinzwe Iterambere ry’ Imibereho Myiza y’ Abaturage yashimiye abagize iri Huriro, ku bwo kuzirikana aho bavuka anasaba ko n’abandi bareberaho.