Byagarutsweho na Hon. Depite Ingabire Aline wifatanyije n'abaturage b'umurenge wa Shangi mu gikorwa cyo Kwibuka ku nshuri ya 31 jenoside yakorewe abatutsi mu 1994, mu ijambo yagejeje ku bitabiriye iki gikorwa cyo kwibukan kuri uyu wa 30 Mata 2025. 

Hon. Depite Ingabire Aline mu ijambo rye yakomeje kandi ahumuriza abacitse ku icumu by'umwihariko abafite ababo baruhukiye mu rwibutso rwa Shangi, agaragaza ko jenoside itatunguranye kuko yateguwe kuva cyera by'umwihariko ikagira imizi mu bakoloni bw'ababirigi baciyemo ibice abanyarwanda. 

Yagaragaje ko hari abagifite ingengabitekerezo ya jenoside bikaba ari inshingano ya buri munyarwanda kurwanya abantu nk'abo. Yagize ati: “Turabizi ko hakiriho abashaka kudutobera. Hariho abakibiba ingengabitekerezo ya jenoside. Abongabo tugomba kubarwanya twivuye inyuma…..Twese rero dufite inshingano zo kurwanya ingengabitekerezo ya jenoside, cyane cyane duhereye mu miryango yacu, kuko ari ho ibiganiro byose bitangirwa. Twebwe rero abakuru turi aha, babyeyi turabasabwa guha abana bacu amakuru y'ukuri yaranze igihugu cyacu, bagakura bazi neza amateka mabi yaranze igihugu cyacu, tunabashishikariza ko baca ukubiri n'ayo mateka mabi bakubaka igihugu twifuza.”

Shangi yari izwi mu mateka nk'igicumbi cy'ukwemera, yahindutse igicumbi cy'icuraburindi mu 1994 ubwo jenoside yakorewe abatusti yabaga, maze interahamwe zigatikiza abatutsi basaga ibihumbi 17.800 zibasanze muri Paruwasi Gatolika ya Shangi aho bari bahungiye no mu nkengero zaho cyane cyane ku cyobo cyiswe icyobo cya “Croix rouge” aho batwarwaga babwirwa ko bagiye gusabirwa ubufasha kuri “croix rouge” ariko bagezwa kuri icyo cyobo bakicwa bakajugunywamo. 

Igikorwa cyo kwibuka ku nshuro ya 31 jenoside yakorewe abatutsi mu 1994 mu murenge wa Shangi cyitabiriwe na komite nyobozi y'akarere ka Nyamasheke, ba depite Hon. Ingabire Aline akaba n'umushyitsi mukuru, Hon. Senani Benoit, Komite y'umutekano itaguye y'akarere ka Nyamsheke, Perezida wa Njyanama y'akarere ka Nyamasheke n'uw'akarere ka Ngoma, Nyiricyubahiro Mgr Sinayobye Edouard umushumba wa diyosezi Gatolika ya Cyangugu, Perezida wa IBUKA mu karere ka  Nyamasheke, abayobozi batandukanye mu nzego zinyuranye n'abandi banyacyubahiro. 

"Twibuke twiyubaka"

Uhereye iburyo Prof. Kamana Emmanuel Perezida wa njyanama y'akarere ka Nyamasheke, Mayor Mupenzi Narcisse, Hon. Ingabire Aline, Hon. Senani Benoit, Gasasira Marcel Perezida wa Ibuka Nyamasheke

Bamwe mu bagize komite y'umutekano y'akarere itaguye

Nyiricyubahiro Mgr Edouard Sinayobye asenga mu gikorwa cyo Kwibuka31 i Shangi

Umuyobozi w'akarere ka Nyamasheke Bwana Mupenzi Narcisse ubwo yagezaga ijambo ry'ikaze ku bitabiriye Kwibuka 31

Bamwe mu bayobozi batandukanye bitabiriye igikorwa cyo kwibuka 31 i Shangi

Mukazayire Beatrice warokokeye i Shangi ubwo yatangaga ubuhamya

Mu bitabiriye Kwibuka31 hari higanjemo urubyiruko rw'abanyeshuri

Abayobozi bafatanya gucana urumuri rw'icyizere