Uyu 01 Ukwakira 2025, mu nurenge wa Gihombo mu kagari ka Kibingo, ubuyobozi bw'akarere ka Nyamasheke n'abashyitsi batandukanye bifatanyije n'abaturage mu gutangiza ukwezi kwahariwe kuzirikana ku Bumwe n'Ubudaheranwa. 

Ibirori byo gutangiza ukwezi kw'ubumwe n'ubudaheranwa byaranzwe n'ikiganiro cya Minisiteri y'Ubumwe bw'abanyarwanda n'Inshingano Mboneragihugu, cyagarutse ku bumwe bw'abanyarwanda n'ibibazo ubu bumwe bwagiye buhura nabyo mu myaka y'ubukoloni na nyuma yabwo, ibyagejeje igihugu kuri Jenoside yakorewe abatutsi. Hatanzwe kandi ubuhamya bugaragaza uko ubumwe n'ubudaheranwa mu murenge wa Gihombo buhagaze hashingiwe ku bufatanye hagati y'abakoze jenoside n'abayikorwe.

Musenyeri Kayinamura Samuel wo mu itorero EMLR yibukije abaturage ko gusaba imbabazi no kuzitanga ari ishingiro ry’ukuri ry’ubumwe. Yatanze urugero rwe bwite, avuga uko nyuma ya Jenoside yakorewe Abatutsi mu 1994, yari afite umutwaro ukomeye mu mutima, ariko intambwe yo kubabarira ikaba yaratumye abona amahoro. “Ubumwe n’Ubudaheranwa byubakwa n’imbabazi. Ndabivuga kuko mbizi, byaranyubatse.”

Umuyobozi w’Akarere, Bwana Mupenzi Narcisse, yagarutse ku mateka y’u Rwanda, agaragaza ko igihugu cyahoze gishingiye ku bumwe n’ubudaheranwa. Yashimangiye ko kuba havugwa ubudaheranwa muri iki gihe, ari ukubera ko Abanyarwanda bo hambere bashoboraga guhangana n’ibibazo bitandukanye kandi ntibaheranwe, bagakomeza kubana mu mahoro. Yibanze ku buhamya bwatanzwe n’abacitse ku icumu n’abakoze Jenoside, aho ubuhamya bw'urugendo rw'imbabazi no kuzitanga, ibyatumye kuri ubu babanye neza kandi bakorera hamwe bubaka ubumwe kandi biteza imbere. Meya ati:“Ubundi nta muntu wakumva uko umuntu wakoze Jenoside yakwicarana n’uwo yiciye bakaganira… ubwo si ubudaheranwa?” 

Yakomeje ashimangira ko hari imbogamizi zikibangamiye ubumwe n'ubudaheranwa, nko kuba hari abacitse ku icumu bataramenya aho imibiri y’ababo iherereye, asaba gutanga amakuru, yibutsa ko bidahanwa n’itegeko. Yaboneyeho kandi gushishikariza abakoze Jenoside gusaba imbabazi, kuko ari kimwe mu bitanga icyizere ko bicujije kandi bagafata ingamba zo kutongera gusubira mu cyaha. 

Mu gusoza, yibukije abari abantu bose, by’umwihariko urubyiruko,ko hari abantu bakwirakwiza ingengabitekerezo ya Jenoside n'amacakubiri bifashishije imbuga nkoranyambaga, aboneraho gusaba urubyiruko gukoresha imbuga nkoranyambaga mu kurwanya abo badashaka ubumwe n'ubudaheranwa by'abanyarwanda.