Ku rwego rw’akarere, umuganda wabereye mu Murenge wa Macuba, Akagari ka Vugangoma, ari naho hatangirijwe ku mugaragaro Icyumweru cy’Umuryango, insanganyamatsiko y’iki cyumweru ikaba ari “Kubaka Umuryango Mwiza”.

Iki gikorwa cyitabiriwe n’abayobozi batandukanye barimo uhagarariye Intara y’Iburengerazuba, Bwana Bisengimana Denis, Komite Nyobozi y’Akarere ka Nyamasheke, ingabo, inzego z’umutekano, abayobozi b’inzego z’ibanze n’abaturage.

Mu bikorwa byakozwe harimo:

1. Gusoza umuhanda wa kilometero 2.5 wahanzwe mu Kagari ka Vugangoma.
2. Gucukura imyobo izaterwamo ibiti ku nkengero z’uwo muhanda hagamijwe kurengera ibidukikije.
3. Gusana ubwiherero bw’imiryango itishoboye itatu.
4. Gutanga serivisi z’ubuzima zirimo gupima indwara zitandura no gutanga inama z’uburyo bwo kubaho neza.

5. Gutanga serivisi mbonezamikurire z’abana bato, kwigisha ababyeyi gutegura indyo yuzuye, no gushishikariza abaturage kugira uruhare mu mikorere y’amarerero.

   Abaturage bagejejweho ikiganiro cyateguwe na Minisiteri y’Uburinganire n’Iterambere ry’Umuryango (MIGEPROF), cyagarutse ku kamaro k’umuryango utekanye kandi ushoboye nk’umusingi w’iterambere ry’igihugu.

   Abayobozi bashimiye abaturage bitabiriye, babibutsa ko umuganda ari umurage w’Abanyarwanda, ukaba isoko y’ubumwe, urukundo n’ubufatanye mu kubaka igihugu cyifuzwa.