Buri wa 15 Ukwakira, isi yose yifatanya mu kwizihiza Umunsi Mpuzamahanga w’Umugore wo mu Cyaro, washyizweho na Loni mu mwaka wa 1995 hagamijwe gushima uruhare rukomeye abagore bo mu cyaro bagira mu guteza imbere ubuhinzi, guharanira umutekano w’ibiribwa no guteza imbere imibereho y’imiryango. Mu Rwanda uyu munsi watangiye kwizihizwa mu 1997, kuri uyu wa 15 Ukwakira 2025 ukwaba wizihizwaga ku nshuro ya 238. 

Kuri uyu wa 15 Ukwakira 2025, Akarere ka Nyamasheke kimwe n’utundi turere tw’igihugu, kazirikanye uyu munsi mu mirenge yose uko ari 15, hareberwa hamwe aho umugore ageze mu rugendo rwo kwiteza imbere no kwigira. Ku rwego rw’Akarere, ibirori byabereye mu Murenge wa Bushenge, byitabirwa n’ubuyobozi bw’Akarere burangajwe imbere na Meya Mupenzi Narcisse, hamwe n’abagize Inama Njyanama, abahuzabikorwa b’Inama y’Igihugu y’Abagore ku rwego rw’intara n’akarere, abafatanyabikorwa ndetse n’abaturage.

Mu ijambo ry’ikaze, Bwana Habumugisha Hyacinthe, Umunyamabanga Nshingwabikorwa w’Umurenge wa Bushenge, yashimangiye ko umugore wo mu cyaro ari moteri y’iterambere ry’umuryango n’akarere, ashimira Inama y’Igihugu y’Abagore mu murenge wa Bushenge ku bikorwa byayo birimo kubakira imuryango utishoboye no guteza imbere ibikorwa bya Mutimawurugo bigamije kuzamura umugore mu iteranbere. 

Umuhuzabikorwa w'inama y'igihugu y'abagore mu karere ka Nyamasheke Madamu Mukakabogora Anasthasie mu ijambo rye kuri uyu munsi yavuze ko kwizihiza umunsi mpuzamahanga w'umugore wo mu cyaro ari umwanya mwiza wo kurebera hamwe inzitizi umugore wo mu cyaro agihura nazo, zimubuza kubyaza umusaruro amahirwe ahari, ndetse no kurebera hamwe icyakorwa kugira ngo umugore wo mu cyaro abashe kubyaza umusaruro amahirwe ahari.  

Muri ibi birori kandi, habayeho kuremera abagore amatungo magufi n'amaremare, gutanga amatungo magufi mu rwego rwo gushimira bamwe mu bagore babaye indashyikirwa mu gufasha inama y'igihugu y'abagore mu murenge wa Bushenge kwisa imihigo ya mutimawurugo, hanatangwa sheki ihwanye na miliyoni 4.219.650 z'amafaranga y'u Rwanda yahawe abafatanyabikorwa 15 ba Compassion International Rwanda azabafasha mu kwagura ibikorwa by'ubucuruzi.   z'amafaranga y'urwanda yo kunganira abagore batishoboye baremewe bahabwa amatungo magufi n’amaremare mu rwego rwo kubafasha kwiyubaka no kwiteza imbere binyuze mu bukungu bushingiye ku mibereho yabo ya buri munsi. 

Mu ijambo rye ryafashije benshi kongera gutekereza ku gaciro k’umugore, Meya Mupenzi Narcisse yagarutse ku butumwa nyamukuru bw’uyu munsi bukubiye mu nsanganyamatsiko igira iti: “Umugore ni uw'Agaciro”, ashimangira ko kumenya agaciro k’umugore ari intangiriro y’iterambere ry’umuryango.

“Kumenya agaciro k’umugore bituma umenya ko umugore ufite agaciro azana iby’agaciro mu muryango. Turashima ko Leta y’Ubumwe yashyize imbere agaciro k’umugore kuko iyo yubashywe, umuryango wose utera imbere n'igihugu muri rusange.”