Umunyamabanga mukuru w'umuryango uharanira kugarura agaciro n'iterambere ry'Afurika mu Rwanda (Pan African Movement/ PAM) Madamu Marie Claire Uwamariya yahuguye abagize komite ya y'uyu muryango ku rwego rw'akarere ka Nyamasheke n'abagize biro zayo mu mirege. “Agaciro no kwigira by'abanyafurika n'abanyarwanda by'umwihariko”, ni interuro ibumbatiye ingingo z'amahugurwa yatanzwe na Madamu Marie Claire kuri uyu wa 10 Gicurasi 2025. 

Aya mahugurwa yari agenewe abagize komite y'umuryango nyafurika uharanira kugarura agaciro n'iterambere ry'afurika ku rwego rw'akarere ka Nyamasheke n'abagize biro z'uyu muryango ku rwego rw'imirenge mu rwego rwo kubasobanurira iby'ingenzi uyu muryango ugamije cyane cyane ari byo bumwe bw'Afurika, gukorera no gushyira hamwe mu rwego rwo kwiha agaciro no kugera ku iterambere rirambye ry'Afurika n'u Rwanda muri rusange. 

Hagaragajwe byinshi byagize uruhare mu kwambura agaciro Afurika no kudindiza iterambere ryayo, byinshi bikaba bifite imizi mu bukoloni, imiyoborere idahwitse ya bamwe mu bayobozi b'ibihugu by'Afurika bakomeje kugendera ku bitekerezo n'imyumvire y'abakoloni. By'umwihariko harebewe hamwe ibikwiye gukorwa ku rwego rw'u Rwanda mu rwego rwo kubaka Afurika n'u Rwanda byihesha agaciro, n'uruhare rwa buri wese kugira ngo ibyifuzwa byose bigerweho.  

Abitabiriye amahugurwa bagaragarijwe ko igikwiye ari uguhindura imyumvire ishaje aho umunyafurika yumvaga ko atakwibeshaho bitagizwemo n'ibihugu byakolonije afurika, hakimakazwa gukorera hamwe nk'abanyafurika mu rwego rwo kwiha no guhesha agaciro Afurika hagamijwe iterambere ry'umugabane w'Afurika. 

Amahugurwa yasojwe abayitabiriye batanga ibitekerezo kandi banabaza ibibazo ku biganiro byatanzwe.