Kuri uyu wa 07 Mata 2017 ubwo hirya no hino mu Gihugu hatangizwaga iminsi 100 yo kwibuka jenoside yakorewe abatutsi, Akarere ka Nyamasheke kawizihirije mu Murenge wa Ruharambuga, Akagari ka Ntendezi.

Habanje umuhango wo kunamira abazize jenoside kuri monima ya Shangazi ahatangirijwe ubwicanyi ndengakamere mu cyahoze ari Cyangugu, hanashyirwaho indabo, umuhango wakurikiwe n’urugendo rwo kwibuka rwerekeza mu kagari ka Ntendezi ahunamiwe abari mu rwibutso rwa Ntendezi.

Nyuma y’urugendo no guha icyubahiro abazize jenoside abaturage bateraniye mu kigo cya EAV Ntendezi ahatangiwe ibiganiro bijyane n’iki gihe.

Ubwo yatangaga ikiganiro ku mateka y’itegurwa n’ishyirwa mu bikorwa rya jenoside yakorewe abatutsi, Honorable KANKERA Marie Josée, yibukije ko jenoside yateguwe guhera kera, ikigishwa neza igacengera  kugeza ubwo ishyizwe mu  bikorwa igahitana abasaga miliyoni aboneraho gusaba ko byaguma mu mateka ariko ntibizongere.

Mu ijambo rye, Visi Perezida w’Inteko ishinga Amategeko Umutwe w’Abadepite Bwana MUKAMA Abbas wari n’Umushyitsi mukuru kuri uyu munsi yashimiye byimazeyo ubwitabire bw’Abaturage, bigaragara  ko ari intambwe ikomeye mu kumva igisobanuro cyo kwibuka. Yashimiye urubyiruko cyane ko ari rwo rwagaragaje ubwitabire avuga ko rugaragaza ikizere cy’ejo hazaza h’Igihugu cyacu. Yakomeje asaba abantu bose gusubiza amaso inyuma bakareba aho u Rwanda rwavuye n’aho rugeze maze bikabatera kureba imbere. Yasabye kandi abagize uruhare muri jenoside gukomeza gutanga amakuru y’ahaba hakiri imibiri itarashyingurwa mu cyubahiro ngo ishyingurwe ndetse no gukomeza kubana amahoro n’abarokotse jenoside, bagafatanya kubaka igihugu cyababyaye.

Uyu munsi witabiriwe n’abaturage bayingayinga ibihumbi icumi, komite nyobozi y’Akarere, Inzego z’Umutekano n’Abakozi b’Akarere

Dikomeze twibuke Jenoside yakorewe abatutsi, turwanya ingengabitekerezo ya jenoside, dusigasira ibyagezweho.

TUYIZERE Jacques

Public Relations, Media and Cmmunication Officer