Mu murenge wa Nyabitekeri, umufatanyabikorwa w'akarere Kula Project yatanze amatungo magufi n'amaremare mu rwego rwo gufasha abaturage bari mu cyiciro cy'abafashwa kwikura mu bukene, hakaba kandi hatanzwe amatungo maremare ku bahinzi ba kawa hagamijwe kubafasha kubona ifumbire y'imborera. Ifumbire y'imborera izakomoka kuri ayo matungo izabafasha kongera umusaruro wa kawa mu bwinshi n'ubwiza.

Aya matungo magufi n'amaremare yatanzwe kuri uyu wa 17 Kamena 2025 yari agizwe n’ihene 102, zikaba zahawe imiryango 51 aho buri muryango wahawe ihene ebyiri. Hatanzwe kandi inka 48 ku miryango 48 y'abahinzi ba kawa mu rwego rwo kubafasha kongera umusaruro wa kawa mu bwiza no mu bwinshi hibandwa ku gukoresha ifumbire y’imborera. 

Abaturage bahawe aya matungo bashimiye umushinga Kula Project wabahaye aya matungo, basezeranya kuyitaho kugira ngo azabafashe kwiteza imbere no kongera umusaruro biturutse mu ifumbire y'imborera izayakomokaho.

Muri uyu mwaka w'ingengo y'imari dusoza, ku muhigo wa Girinka akarere kari kahize gutanga inka zigera kuri 442, uyu muhigo ukaba waramaze kweswa kuko hamaze gutangwa inka zigera kuri 455. Iki ni igikorwa cy'ubufatanye n'akarere mu gufasha abaturage kwiteza imbere, cyane cyane hagamijwe kuzamura abaturage bari mu cyiciro cy'imiryango iri ku rutonde rw'imiryangi ifashwa kwikuravmu bukenw.

Amatungo yose yatanzwe afite agaciro kangana na miliyoni cumi n’eshanu (15,000,000Rwf) z’amafaranga y’u Rwanda.