Urubyiruko rwahisemo gukora umwuga w'ubunyonzi rwahawe amagare

Umuyobozi w'akarere wungirije ushinzwe iterambere ry'imibereho myiza y'abaturage Madamu Mukankusi Athanasie yakiriye urubyiruko ruherutse gusoza amasomo y'igororamuco mu rwego rwo kuruhuza n'amahirwe y'imirimo itandukanye rwahisemo gukora mu karere ka Nyamasheke.

Nyuma yo kwakira uru rubyiruko no kuruganiriza ku mirimo rwahisemo, hakurikiyeho gushyikiriza amagare batatu abahisemo gukora umwuga w'ubunyonzi n'imashini y'ubudozi uwahisemo gukora ubudozi.

Ibi bikorwa byo gutanga ibikoresho byakurikiwe no gushyikiriza  uruganda rw'icyayi rwa Gisakura abagera kuri 57 bahisemo gukora mu cyayi. 

Umuyobozi w'akarere wungirije ushinzwe imibereho myiza yasabye urubyiruko rwahisemo gukora mu cyayi kurangwa n'imyitwarire myiza, kwita ku mazu n'ibikoresho by'uruganda no kubanira neza abasanzwe bakora mu cyayi batuye muri aya mazu. Yabibukije ko bakwiye guha agaciro akazi babonge mu ruganda bakirinda icyatuma bongera gusubira mu bikorwa byatumye bajyanwa mu bigo ngororamuco.

Uru rubyiruko rwatujwe mu mazu y'uruganda yubatse mu murenge wa Ruharambuga akagari ka Ntendezi mu mudugudu wa Kamabuye. 

Basobanuriwe imiterere y'akazi bazakora mu cyayi, abatazi gusoroma icyayi bamarwa impungenge kuko bazigishwa uko gisoromwa.

Umuyobozi w'umurenge Madamu Nabagize Justine yabakiriye mu murenge abasaba kwitwara neza bagakora neza akazi kandi bakirinda gusesagira kugira ngo bazabashe kwiteza imbere uko igihugu kibibifuriza.

Byitezwe ko aka kazi kazafasha uru rubyiruko kubona ubushobozi bwo kwiteza imbere bityo kakabarinda kongera gusubira mu bikorwa bibi byatumye bajyanwa mu bigo ngororamuco.

 Urubyiruko rwahisemo gukora mu cyayi rwahawe impanuro rugeze aho ruzatura mu mazu y'uruganda rw'icyayi