Nk’imwe muri gahunda ya Leta yo guteza imbere ubumenyingiro, kurwanya ubushomeri, ndetse no kwihangira imirimo mu rubyiruko, hashyizweho gahunda yo kwigisha imyuga itandukanye mu kigo cy’urubiruko cy’Akarere ka Nyamasheke.

Iki kigo cyakira urubyiruko rutandukanye ruturuka hirya no hino mu mirenge igize aka Karere, rurimo abacikije amashuri, abarangije amashuri yisumbuye ndetse n’abarangije kaminuza baba bashaka kugira ubumenyi mu myuga yigishirizwa muri iki kigo kugirango babashe kwihangira imirimo no kwiteza imbare.

Nkuko umuhuzabikorwa w’ikigo cy’urubyiruko cya Nyamasheke Ishimwe Jean Bosco abivuga, urubyiruko rwigishwa imyuga itandukaye irimo ubudozi, gutunganya imisanzi n’ubwiza, gukora inkweto, ikoranabuhanga ndetse n’ubwogoshi.

Mu rwego rwo gufasha urubyiruko kwiga imyuga no guhabwa serivisi zitangwa, ikigo cy’urubyiruko cya Nyamasheke kifashisha imbuga nkoranyambaga, ibitangazamakuru bitandukanye, imyidagaduro ihakorerwa, kwegera urubyiruko mu mirenge ruherereyemo, mu rwego rwo kubashishikariza kugana iki kigo ngo rwigishwe imyuga irufasha kuva mu bushomeri ndetse n’ubuzererezi.

Umuhuzabikorwa w’iki kigo, yemeza ko ubumenyi butangirwa muri iki kigo bubyazwa umusaruro, kuko iyo umunyeshuri arangije kwiga ahabwa impamyabushobozi, hanyuma ku bufatanye n’Akarere hamwe n’abandi bafatanyabikorwa, urubyiruko rukishyira hamwe rugafashwa kubona ibikoresho rugatangira gukora.

Ati: Kuri ubu hari amashyirahamwe 4 akora umwuga w’ubudozi, amashyirahamwe 3 y’abize ubwogoshi, amashyirahamwe 2 y’abize gukora inkweto ndetse n’abandi bikorera ku giti cyabo barimo; abatanga indirimbo, abatunganya amafoto ndetse hakaba hari n’uwashinze sitidiyo izwi nka Boston record, bose bakaba bakoresha ubumenyi bakuye hano.

Bamwe mu banyeshuri biga muri iki kigo, bemeza ko ubumenyi bahabwa buzabafasha kandi bugahindura imibereho yabo.

Niyomahirwe Chanceline wiga umwuga w’ubudozi yagize ati: “nkirangiza ikiciro rusange nta kintu narimfite cyo gukora, mpitamo kuza kwiga umwuga aho kwiyandarika, hano bigisha ibintu byose iyo uzi icyakuzanye ubikora neza. Akomeza avugako yahisemo kwiga muri iki kigo kuko kibafasha cyane kikabigisha ku mafaranga make cyane avugako atakitwa ay’ishuri, mu gihe kwigishwa n’abandi bakora uwo mwuga babaca menshi bitwaje ko nabo bishyuye”

Mbarushimana Dominique wiga gutunganya umusatsi guca inzara no kuzisiga wanarangije amashuri yisumbuye, avugako yahisemo kubyiga kuko yabonyeko hari ababikenera iwabo bakajya kubireba kure, avugako bizamugirira akamaro kuko azabivanamo amafaranga aho kwicara ntacyo akora.

Uwatonnye Claudine na Niyonkuru Emmanuel bose bize imyuga muri iki kigo bakaba bamaze igihe bakora imyuga bahigiye, bemeza ko ubumenyi bahakuye bumaze kubageza kuri byinshi birimo, kwiyishyurira ubwisungane mu kwivuza, amatungo, kugura ibikenerwa mu buzima bwa buri munsi n’ibindi bitandukanye.

Ikigo cy’urubyiriko cy’Akarere ka Nyamasheke kimaze kwakira urubyiruko ibihumbi cumi na bitatu (13000) kuva cyatangira muri 2011.