Kuri uyu wa 30 Mutarama 2026, Urwego rw’Umuvunyi rwasoje gahunda y’icyumweru ya gahunda yo kukumira no kurwanya ruswa n'akarengane yatangiye ku wa 26 igasozwa ku wa 30 Mutarama 2026. Ni igikorwa cy'ubukangurambaga cyageze mu mirenge yose uko ari 15 igize akarere, abakozi b'urwego rw'umuvunyi bakaganira n'abaturage ku mikorere y'urwego rw'umuvunyi, kurwanya akarengane na ruswa kandi bakakira ibibazo byabo.

Ku biro by'akarere abakozi b'urwego rw'umuvunyi bayobowe n'Umuvunyi Mukuru wungirije ushinzwe gukumira no kurwanya akarengane, Madamu Yankulije Odette, bakiriwe n'Umuyobozi w'Akarere wungirije ushinzwe iterambere ry'ubukungu Bwana Muhayeyezu Joseph Desire ari kumwe n'abagize komite y'umutekano y'akarere itaguye, abanyamabanga nshingwabikorwa b'imirenge n'abandi bakozi b'akarere baganira ku byavuye muri icyo gikorwa mu gihe cy'icyumweru.

Mu gihe cy’icyumweru, Urwego rw’Umuvunyi rwakiriye ibibazo 283 by’abaturage, muri byo 105 byabonewe ibisubizo ako kanya. Ibibazo 167 byagaragaye ko bifite ishingiro bikazakurikiranwa n’Akarere ku bufatanye n’izindi nzego bireba, mu gihe ibibazo 11 nabyo bifite ishingiro bizakurikiranwa n’Urwego rw’Umuvunyi.

Umuvunyi Mukuru wungirije yashimiye ubuyobozi bw’Akarere ka Nyamasheke ku bufatanye n’intambwe imaze guterwa mu gukemura ibibazo byari byaragaragaye mu gikorwa nk’iki cyabaye umwaka ushize. Ubuyobozi bw’Akarere na bwo bwijeje gukomeza gukora ibishoboka byose kugira ngo ibibazo byagaragaye bikemurwe, mu nyungu z’abaturage no guteza imbere imiyoborere myiza.